الرئيسية / تجربتي / “هبة رجب” تضع لكم قواعد سيوة الـ20 “للروقان”

“هبة رجب” تضع لكم قواعد سيوة الـ20 “للروقان”

كتب – هشام لاشين :

لو بتفكر في رحلة إلي سيوة ، و نفسك تنبسط ، لابد أنك تراجع قواعد هبة رجب الـ20″ للروقان” ،تقدر تسافر مع مجموعه و بالتالي تستطيع تقليل حجم النفقات عليك ، ممكن  تركب اتوبيس غرب الدلتا ، قيمة التذكرة ذهاب و إياب 360 جنية و هناك كل حاجه تمارسها  لها حسابها ، لكن متوسط الإنفاق  لو “انبسطت” و صرفت حلو يعني ممكن 2000 ج خلال 3 ايام كاملين.

سيوة قواعد الروقان

و أولي قواعد ” الروقان” أن تنسي كل وسائل التكنولوجيا حتي السليفي ، أما القاعدة الثانية  لما تسافر سيوه لازم تأكل “كريب بلح بالشكولاتة من مطعم عبده

القاعدة الثالثة هناك فى مطعم فوق جبل شالى اسمه ” البابنشال ” الاسم ده باللغة الأمازيغية ومعناه باب الدخول , المطعم ده على سطح و جزء من جبل شالي – و أحلى أكله ممكن تأكلها هناك ( فراخ مطبوخه بالزيتون و ملوخيه بطريقه عجيبه وهميه ) و صحيح لا تنسي مشاهدة الشروق يوم من فوق الجبل.

القاعدة الرابعة ، الأمازيغ ” أهل سيوه ” هم مصريين زينا زيهم – أتعرف على ثقافتهم و أتعلم لغتهم.

القاعدة الخامسة :   “لازم تتغدى يوم فى جنينه حد من أهالي البلد”

القاعدة السادسة : 

” أنا كل مره بسافر سيوه بعمل حاجه جديدة لأن سيوه فيها حاجات كثير ممكن تعملها ، و خصوصا مكان البيات في الصحراء ، و كل مره بيكون شكل الشروق مختلف .

Posted by Heba Ragab on Sunday, September 23, 2018

القاعدة السابعة : ” لازم تبات فى الصحراء و تعمل سفاري و تقضى اليوم بطريقه بسيطة”

القاعدة الثامنة :

” فى سيوه فى نوعين من الكامب،  (الكامب الجاهز بكل حاجه مثل عثمان و فتحى و الماظه) وغيرهم …. تقدر  تسهر و تبات هناك او تبات في كامب انت تجهزه بنفسك فى وسط بحر الرمال الأعظم فى وسط الصحراء من غير حتى صوت الدبان أنت و النجوم و بس” .

هبة خلال رحلتها إلي سيوة

القاعدة التاسعة : في تلك القاعدة نأتي لنشاط لابد منه  
“أركبوا عجل و أتحركوا بيه هناك تخيل كده و انت بتتحرك بالعجل يمينك نخل و شمالك بحيره فى شارع صغير و روحوا شوفوا الغروب على بحيره فطناس – اعظم غروب ممكن تشوفه فى حياتك فعلا ( تداخل اشعه الشمس مع خطوط الميه فى البحيره و الدفا اللى بيتسرسب لجسم و انت بتشرب ميلك شيك البلح ) جنه “

القاعدة العاشرة من قواعد الرقان ” وهي جزيرة طغاغين ، الجنة الصغيرة داخل سيوة ، أكواخ و شموع في جزيرة وسط بحيرة في  سيوة و هي تشبه المالديف ،بس روحو و قضوا ليلة هناك علي شط البحيرة  باليل و شاهدو النجوم و القمر.

الطبيعة في سيوة


القاعدة الحادية عشر

زوروا فندق أدرير أميلال – فندق جعفر – الفندق المصنف بيئيا

 من احسن الفنادق العالمية  أقل ليله فيه ب 400 ج استرليني

 لو حابب تقعد في منتجع رايق و اسعاره حلوه روحوا منتجع سيوه شالي انا بتبسط هناك جدا و في عين ميه سخنه و حمام سباحه، روقان .

القاعدة الثانية عشر :

كل عيون الميه  هناك حتى المالحة أنزلوها و أتعالجوا طبيعي ! من أكبر الأماكن فى مصر  فيها طرق علاج  طبيعى و حمامات الرمل .. استمتعوا بالطبيعة

القاعدة الثالثة عشر:
لابد من زيارة منتجع تازيري و تاكل اكل مغربي من الشيف هناك و تقضي اليوم مع أحلى مشاهد  ممكن تشاهدها في يومك .

القاعدة الرابعة عشرة:

لازم تعدي علي عثمان و تأكل من ايديه احلي فراخ/بط/لحم مردم في الكون و مكرونة مبقبقه .

القاعدة الخامسة عشر
اشتروا زيتون و بلح و كل المنتجات الموجودة  هناك لا نها فعلا حلوه جدا جدا من عند مصطفي شالي .

القاعدة السادسة عشر :

طبعا تعدوا علي بازار سيوه خصوصا البنات و شوفوا المنتجات اليدوية حلوه ازاي و رخيصة جدا عن  القاهرة و احلي و مميزه جدا .

البحيرة في سيوة

القاعدة السابعة عشر:
“لما تروحوا عين كيلوباترا لازم تجربوا مشروب جديد من عند جوبا كل مره بشرب حاجه جديده و بحب جدا المانجا بالريحان.

القاعدة الثامنة عشر:
“لو قضيت مده هناك طويله تتبسطوا جدا و تتعرفوا علي الناس أكتر و اكتر. و تفصلوا عن العالم القميء اللي احنا عايشينه و سيوه في الويك   حاجه و في وسط الاسبوع حاجه تانية خالص  كأنك واحد من اهل البلد فعلا  .

القاعدة التاسعة عشر:
“زوروا معبد امون و جبل الموتي و ادخلوا الجزء الاثري  هناك  مليان الوان.. اطلعوا جبل الدكرور و شوفوا الشروق”

القاعدة العشرين :
“لازم تنزلوا البحيرات المالحة بس حاسبوا عينيكم لانها بتحرق جدا   خدوا ملح صخري من هناك و شوفوا سبحان الله قد ايه في جمال في مصر بالشكل ده .

في نهاية الرحلة تنصحكم هبة رجب بالاستمتاع بالرحلة ، عيشوا التجربة .

 

 

شاهد أيضاً

الخيامية تراث يغزله المصريون بخيوط الأصالة.. أول الحرف التي تعلمها الإنسان3

الخيامية تراث يغزله المصريون بخيوط الأصالة.. أول الحرف التي تعلمها الإنسان

كتب – أحمد زكي : الخيامية هي فن مصري والمصطلح مشتق من كلمة “خيام”، وهو صناعة …