10 نصائح تسهل عليك إجراءات السفر لأي دولة أوروبية

كتب-محمود قورة:

قدمت ريهام الشرقاوي، إحدة العاملات بمجال السياحة، مجموعة من النصائح يمكن أن يفعلها المستخدم حالة أراد السفر إلى دولة أخرى.

وتحكى الشرقاوي، عن أبزز الأشياء التى لا بد وأن تكون محط أنظار العديد من المسافرين، ملخصة تجربتها المثيرة لمدة 6 سنوات فى 10 نصائح. تعرف عليهم:

١- خلص كليتك، أو دراستك و جدد باسبورك بالمؤهل الخاص بك(خريج كذا كذا).

٢- لو بتشتغل جدد باسبورك بالشغل الخاص بك (بتغنييك عن ورقة HR Letter).

٣- لو ولد ومسافر شغل طلع تصريح العمل (عشان محدش يضايقك في المطار، ممكن يعدوك مرة و التانية هيرخموا ).

٤- تحتاج (تصريح سفر ) لو انت طالب و مسافر في السنة الاخيرة من كليتك،

الورق: (إثبات قيد + صورة البطاقة + صورة جواز السفر+ صورة التاشيرة + قرار وزارى لو انت ف سنة رابعة).

٥- اسأل علي التصريح الأمني لبعض البلاد وعلي اساس باسبورك مكتوب فية ايه الحوار ده بيتحدد أهميتة من عدمها.

٦- باسبورك اهم من أي حاجة في الرحلة، حافظ علية زي ابنك.

٧- باسبورك لو اتسرق، بتعمل محضر في البلد اللي انت فيها، هيديك وثيقة سفر (تسمحلك تسافر لبلدك تاني لمرة واحدة ذهاب بس)، و بعدين تطلع ع السفارة تبلغ هناك و تقولهم عايز أطلع بدل فاقد، تفضل وراهم عشان هم بينسوا و الخطواط انهم بيبعتوا لمصر مثلا عشان يجيبوا تأكيد أنهم يعملولك باسبور و بعدها يجي الموافقة وبعدها تدفع الفلوس وتستني شهر كده يطلعلك باسبور

٨- شهادة التحركات:

ودي ورقة بتقول انت سافرت فين في آخر كام سنة، ودي من ضمن الورق المطلوب يعني السفارة هيا اللي بتطلبها، لو مطلبتهاش متعملهاش (تروح مجمع التحرير بدري من ٨ الصبح عشان تلحق).

الورق : صورة بطاقة شخصية سارية، صورة اول صفحة في الباسبور والصفحات اللي فيها فيز تانية لو عندك يعني.

٩-عايز تعمل باسبور

تروح الجوازات تملي البيانات

الورق :

ستة صور شخصية خلفة بيضاء.

البطاقة الشخصية وصورة ليها.

الشهادة الجامعية او اثبات قيد إنك طالب

شهادة الجيش وصورة منه لو ولد

قسيمة الزواج لو متزوجه

١٠-السفر كورق

دول اهم الطلبات لأغلب الفيز (شنجن و آسيا)

باسبورك , صورة شخصية, حساب البنك , ورقة تثبت عملك , خطتك او بمعني ابسط حجوزات مؤكدة غير قابلة للأسترجاع للطيارة و الفنادق , الابليكشن بتاعة الفيزا نفسها، لو مسافر شغل يبقي لازم عقد العمل من مكتب الهجرة في البلد اللي رايحلها و شوية ورق تاني و اغلبه زي اللي قولت علية فوق.