بلد العذاب والقسوة..مريم الهدهد تحكي تجربتها ببولندا :”كنت حساها بلد كئيب”

كتب-محمود قورة:

تحكي مريم الهدهد، إحدى المصريات المقيمين فى بولندا، تجربتها قبل السفر إلى بولندا، قائلة: “في الأول كنت حساها بلد كئيبه جدا، وكنت مستغربه أني هزور مكان زي ده بس فعلا كنت لازم أروح، المكان كئيب قوي كأنك ميت وفيه إحساس غريب قوي بين العذاب والقسوة وكمان صمت رهيب في إحساس أنه في حاجه ثقله علي القلب بس المكان كبير قوي قوي، أكثر حاجه استفزتني الناس اللي بتصور هناك ولا كإنه برج إيفل وعدم احترمها ان في ملاين اتعذبوا وماتوا مخنوقين من الغاز وبعدين اتحرقوا والناس اللي بتهزر هناك ولا كأنه café”.

وبعد مرور شهور فى بولندا تحكي الهدهد: “اكتشفت ان بولاندا فيها كنائس كثيره قوي و في شوارع فيها ٥-٦ كنائس و في كنيسة اسمها cathédrale Sacres في Colline de Wawel بس للأسف التصوير فيها ممنوع، جميلة جدا و من أحلي الكنائس اللي دخلتها في حياتي و فيها جرس كبير في الدور الأخير و لازم تلمسه بصباعك الكبير”.

وعن المزارات الموجودة فى بولندا تقول الهدهد: “زرت منجم تصنيع الملح وده قصه لوحده، ودا يعتبر أجمل حاجة زرتها فى بولندا، غير أني نزلت ٥٦ دور تحت الأرض و غير أني عرفت طرق التعدين و التصنيع، المكان عالمي بمعني الكلمه ومشينا فيه سعتين مبيخلصش والحيطة و الأرض والسقف والتماثيل كله من الملح وكمية المتاهات اللي جواه و السلالم و الضخامة كنت واقفه طول الوقت متنحه من اللي شيفاه، بجد جميل بطريقه مش طبيعيه و في هناك قاعة للأفراح زي بتاعت الأميرات في أفلام الكرتون، أنا أول ما شوفتها قولت أنا عايزه أعمل فرحي هنا مليش دعوة طب أعزم أهلي وأعمل حفله هنا، وفي تماثيل لشخصيات معمولة من الملح والملامح بالضبط زي الحقيقة”.